我的T-shirt、衛衣與袋｜Road To MARS

平日打劍以外嘅時間，行街買衫都係我其中一個最鍾意嘅嗜好。中二、三時我鍾意睇日本潮牌如A Bathing Ape、CDG、Original Fake⋯⋯後尾覺得自己好「旺角」，嘗試脫離「旺角」。中四五六開始睇歐美牌子Hollister、A&F、Jackwills；後來到大學，硬係覺得太gentlemen嘅衫好悶，唔太適合我，便留意一啲滑板品牌、帶有街頭風味嘅衫，例如Palace、Supreme、Stussy、Stussy至今仍然係我最鍾意嘅牌子之一。然後受YouTuber Kenijima影響，我開始鍾意睇vintage衫、買band tee、靚洗水嘅牛仔褲！

經過多年嘅購物經驗，我對自己嘅口味已經大概掌握得七七八八。今日我就簡短地同大家分享一下我對T-shirt、衛衣同袋嘅愚見！

首先，係T-shirt。因為我覺得我嘅鎖骨唔係特別靚，必須要著一啲oversized或fit sized高領厚collar嘅T-shirt，顯得挺身一啲。我鍾意一段時間著淨色tee，一段時間著graphic tee，因為長期著淨色tee會覺得好悶，長期著graphic tee又會覺得太「花厘碌」。兩者替換對我嚟講就係最好嘅平衡！

第二，係衛衣。一般衞衣無論有冇拉鏈，我都鍾意領口冇繩。Cutting就希望oversized，件衫唔好太長，但係個膊頭位可以闊啲、著上身有微微下垂嘅感覺，令到我望落去冇咁瘦。

以上兩者，設計方面希望有少少vintage元素，帶點洗水成份，少少distressed。當然適可而止吧，過咗火就真係好似一件爛咗嘅衫。顏色就主要白黑同灰色。

最後，就係袋。唔知係咪細個返學成日都揹背囊，而家我係從來唔會再揹背囊。我比較鍾意一啲中size嘅單邊或者係斜揹袋，包括duffle bag同tote bag⋯⋯通常我會皮袋同布袋輪換，因為揹死一種布料嘅袋會覺得好悶。係，我好怕悶⋯⋯

咁多年來嘅買衫過程，尋尋覓覓，撞過好多次板，因為唔清楚自己究竟真係鍾意啲咩，買過好多件自己後悔買咗嘅衫。直到而家，我應該大概掌握到自己嘅口味，所以買錯衫嘅機率就大大減低。

希望大家都買到自己嘅心頭好，幸福快樂吧！

P.S 附上我同Aim Higher Club crossover推出嘅產品sample圖片(T-shirt、衛衣、袋)，應該可以喺Aim Higher Club網店或者Grocery朗豪坊分店買到！

Text：蔡俊彥
Photo：蔡俊彥，Aim Higher Fencing Club，Nicole
原文刊於《運動版圖》2025年4月號
更豐富內容請支持印刷版或電子版！